286/2014 EBAZPENA, ekainaren 15ekoa, Hezkuntzaren, Lanbide Heziketaren eta Unibertsitateen zuzendari nagusiak emana, Nafarroako Foru Komunitatean Haur Hezkuntzako bigarren zikloa, Lehen Hezkuntza, Derrigorrezko Bigarren Hezkuntza eta Batxilergoa ematen duten ikastetxe publikoen antolaketa eta funtzionamendua 2014-2015 ikasturtean arautzeko jarraibideak onesten dituena.
| Sección | I. Nafarroako Foru Komunitatea |
Ebazpen honen xedea jarraibide batzuk onestea da, indarreko araudiko zenbait alderdiren xehetasunak eman eta garatzeko balio dutenak, ikastetxeen antolaketa egokia eta funtzionamendu ona lortzeko, 2014-2015 ikasturtean.
Antolamenduaren eta Aukera Berdintasunaren Zerbitzuko zuzendariak ebazpen hau onestearen eta aurreko puntuan adierazitako jarduketak arautzearen aldeko txostena aurkeztu du.
Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz,
EBATZI DUT:
-
Ebazpen honen eranskinetan ageri diren jarraibideak onestea. Jarraibide horiek Nafarroako Foru Komunitatean Haur Hezkuntzako bigarren zikloa, Lehen Hezkuntza, Derrigorrezko Bigarren Hezkuntza eta Batxilergoa ematen duten ikastetxe publikoen antolaketa eta funtzionamendua arautuko dituzte 2014-2015 ikasturtean.
-
Ebazpen honetan aipatutako jarraibideak ikastetxe pribatu itunduei aplikatuko zaizkie, indarra duten arauei jarraikiz, dagozkien afera orotan.
-
Ebazpen hau eta eranskinak Nafarroako Aldizkari Ofizialean argitaratzea.
-
Ebazpena eta eranskinak igortzea Antolamenduaren eta Aukera Berdintasunaren Zerbitzura, Hezkuntzako Parte-hartzearen, Irakasleentzako Arretaren eta Informazioaren eta Komunikazioaren Teknologien Zerbitzura, Hizkuntzen eta Arte Ikasketen Zerbitzura, Lanbide Heziketaren Zerbitzura, Unibertsitateen, Kalitatearen eta Prestakuntzaren Zerbitzura, Hezkuntzako Ikuskapen Zerbitzura eta Giza Baliabideen Zerbitzura, behar diren ondorioak izan ditzaten.
-
Ebazpen honen aurka, gora jotzeko errekurtsoa jartzen ahal da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.
Iruñean, 2014ko ekainaren 25ean.–Hezkuntzaren, Lanbide Heziketaren eta Unibertsitateen zuzendari nagusia, David Herreros Sota.
-
ERANSKINA
Haur Hezkuntzako bigarren zikloa eta Lehen Hezkuntza ematen duten ikastetxeen antolaketa eta funtzionamendua 2014-2015 ikasturtean arautzeko jarraibideak
Ikasturte hasierako jarraibideek indarreko araudiaren alderdi batzuk zehaztu eta argitzen dituzte, eta arautu gabeko beste batzuk arautzen dituzte, ikastetxeen antolaketa eta jarduna hobetzeko. Horretaz gainera, ikasturterako lan ildo nagusiak ezarri nahi dituzte.
Jarraibideak hiru kapitulutan daude banatuta:
Lehenbizikoa, urteko programazio orokorrari buruz. Bertan ikastetxearen hobekuntza planaren gaineko argibideak ematen dira, bai eta ebaluazioetan duen parte-hartzearen gainean ere, hobetzen ahal diren eremuak detektatzeko.
Bigarrenean, antolakuntza alderdi batzuk zehazten dira, ikastetxearen funtzionamendurako beharrezkoak direnak.
Hirugarrenean, gehien erabiltzen diren LOEren ondoriozko arauak zerrendatzen dira.
I.–Urteko Programazio Orokorra.
Urteko programazio orokorra oinarrizko tresna bat da eta ikastetxeko plangintza, antolaketa eta funtzionamendua biltzen ditu. Garrantzi berezia du haren hobekuntza planak, ikastetxeko hezkuntza proiektuan dauden alderdiak urtero zehazten baititu. Agiri horren elaborazioa zorroztasunaren, erraztasunaren eta erabilgarritasunaren eskakizunei lotu behar zaie.
Autonomiaren, erantzukizunaren eta efizientziaren printzipioekin bat etorriz, zuzendaritza taldeak bere baliabideak kudeatu behar ditu eta plangintza egin behar du (antolaketa, ordutegia, barruko eta kanpoko koordinaziorako egutegia, etab.), ikasleen zaintza zein emaitza akademikoak hobetzeko.
Kalitate programetan parte hartzen duten ikastetxeek hobekuntza planaren helburuak sartuko dituzte urteko planean. Ikastetxe horien dokumentazioa kalitate eskuliburuan bildutakoa izanen da, bidezkotzat jotzen dutenean hura osatzeko aukera galarazi gabe.
-
-
Ikastetxeko hobekuntza plana.
–Hobekuntza planak urtero zehazten ditu ikastetxeak lehenesten dituen helburuak, hartan garatzen diren planei eta programei buruz. Helburu horiek oinarri dituzte aurreko ikasturteko memoriako ondorioak, baina beharrezkoa den beste edozein erants daiteke.
–Ondoko gaiei buruzko helburuak erantsi beharko dira:
Emaitzak, kanpoko nahiz barruko ebaluazioetan. Baloreetan oinarrituta dagoen ikasleen hezkuntza. Bizikidetza plana. Aniztasunari arreta emateko plana. Tutoretza plana. Atzerriko hizkuntzak ikasteko programa, halakorik balego. Integra IKT Programa, halakorik balego. Aurreikusitako helburuak lortzera zuzendutako jarduketak ezarriko ditu hobekuntza planak, ikuspegi orokor eta integratzailetik, ikastetxearen egoeraren azterketa abiapuntu duena, denboran jarraitasuna duela kontuan hartuta.
–Datuetan oinarritutako egoeraren azterketa erraztu eta bateratzeko asmoz, “Educa” kudeaketa sistemak berarekin dakar, kudeatzailearen profilean, galdeketa automatizatuak egiteko aukera.
–Ikastetxeek, errealismoaren eta eraginkortasunaren irizpideak erabiliz, errendimenduaren hobekuntzarekin eta ikasleen balioekin lotura handiagoa duten helburuak hautatuko dituzte, ikastetxearen diagnostikoaren arabera (Lehen Hezkuntzako hirugarren ikasturteko banakako ebaluazioa, emaitza akademikoak, memoriak, klaustroaren erabakiak, etab.).
–Atzerriko hizkuntzak ikasteko programak irakasten dituzten ikastetxeetan, Lehen Hezkuntzako bigarren ikasturteko ikasleei kanpoko ebaluaziorako proba aplikatuko zaie, uztailaren 12ko 110/2011 Foru Aginduaren 6.3 artikuluan ezartzen dena.
–Ikastetxearen hobekuntza planean aurreikusitako neurriek adierazle batzuk izan beharko dituzte, haien eraginkortasuna ebaluatzeko. Emaitzak ikasturte bukaerako memorian sartuko dira.
Hezkuntza Departamentuak, bere zerbitzuen bidez, ikastetxe bakoitzaren hobekuntza planaren garapena sustatuko du, orientazioak, proposamenak eta jardunbide egokien adibideak emanez, ikastetxeek hobekuntza lerro eta jarduketak lehenetsi eta hautatzeko laguntza izan dezaten. Halaber, ikasleek noraino garatu dituzten ohiturak eta balioak zehazteko sistema bat argitaratuko da.
–Ikastetxearen prestakuntza plana prestakuntza instituzionalaren gakoa da. Zuzendaritza taldeak ezarriko du haren edukia, klaustroaren proposamen guztiak jaso ondoren, hobekuntza planetik eratorritako premiak kontuan hartuta lehentasunez.
–Hezkuntzako Ikuskapen Zerbitzuak gainbegiratuko du urteko programazio orokorreko hobekuntza planaren garapena, bere plan estrategikoaren arabera.
-
Bizikidetza eta berdintasuna.
–Bizikidetzaren eta berdintasunaren balioak gakoak dira eta ikastetxe bakoitzeko hezkuntza proiektuaren parte dira. Bizikidetzaren planaren barruan, edonola ere, honako hau sartuko da: pertsona guztiek, emakumezkoak edo gizonezkoak izan, tratamendu, eskubide eta erantzukizun berdinak izateko printzipioa, eta ikastetxea giza balioak eta bizikidetza demokratikoa sustatzeko konpromisoa.
–Bizikidetza planean curriculumeko eta antolamenduko neurriak biltzen dira bizikidetza hobetzeko eta eskola jazarpenaren edo tratu txarren egoerei aurrea hartzeko eta arreta emateko, eta tratamendua eta aukera berdinak eta errespetua sustatzeko eskola-elkarteko kide guztien artean, salbuespenik egin gabe, gizona ala emakumea izan.
–Genero indarkeriaren kasuak prebenitu, atzeman eta bideratzea nolabait bereizi behar da, beste indarkeria mota batzuekin nahastu gabe. Hala ere, ikastetxe bakoitzeko arau, neurri eta egitura guztien sinergiarekin batera ulertu eta gauzatu behar da, prestakuntza integralari eta bizikidetzari dagokienez.
–Bizikidetza plana kasuan kasuko urteko zehaztapenean eguneratu eta egokituko da. Hezkuntza Departamentuak, 2014-15 ikasturtea hasi baino lehenago, ikastetxeei agiri bat igorriko die, beharrezko zehaztapenak bilduko dituena Bizikidetza plana urtero zehazteko, 47/2010 Foru Dekretuan aldaketa egitearen ondorioz eta Nafarroako hezkuntzan genero indarkeria prebenitzeko eta berdintasunaren heziketarako planak indarra hartzearen ondorioz.
-
Aniztasunari arreta ematea.
–Ikastetxeetako zuzendaritzek Aniztasunari arreta emateko planaren zehaztapen bat igorriko diote, euskarri elektronikoan, Aniztasunarekiko Arretaren eta Hezkuntza Premia Berezien Atalari. Bertan jasoko da zein diren antolakuntzan gauzatutako neurriak eta nola banatu diren esleitutako baliabideak.
–Hezkuntza Departamentuko webean orientazioak daude plan hori prestatzeko:
http://www.educacion.navarra.es/eu/web/dpto/plan-de-atencion-a-la-diversidad
–Ikasle guztiei behar bezalako arreta emateko, ikastetxeek premiei egokien erantzuten dieten arretarako neurriak antolatuko dituzte, indarreko araudian xedatutakoaren arabera. Premia horien artean ikastearen nahasmendutik eta arreta faltagatiko nahasmendutik (hiperaktibitatearekin) eratorriak daude, bai eta gaitasun intelektual handietatik eratorritakoak ere. Orobat, ikasleengan detektatzen diren premia guztiei erantzuteko, behar diren proba egokitzapenak, metodologia aldaketak eta abarrak garatuko dira.
–Hezkuntzako arretarako neurrien artean, curriculum-egokitzapen garrantzitsuak diseinatuko dira hezkuntza premia bereziak dituzten ikasleentzat, hala behar dutenean, funtsean helburuak eta trebetasunak garatzeko eta lortzeko. Horren gaineko erantzukizuna alor horretako irakasleei dagokie.
–Berariazko egiturei atxikitako ikasleen curriculum-egokitzapen garrantzitsuak Pedagogia Terapeutikoko irakasleek egin behar dituzte.
Hezkuntza orientabidearen ardura dutenek irakasleak aholkatuko dituzte eta haiekin elkarlanean arituko dira curriculum-egokitzapen garrantzitsuak prestatzeko.
Nolanahi ere, hezkuntzako arretarako neurrien jarraipena ikaslearen tutoreari dagokio. Horretarako, Hezkuntza sostengurako unitatea koordinatzen duen orientatzailearen aholkularitza izanen du.
–Hezkuntza indargarrirako edo sostengurako neurriak kasuan kasuko ikasleen premietara egokituko dira. Irakasle taldeak, multzo bakoitzeko antolakuntza taldeak eta hezkuntza sostengurako unitateak antolatu behar dute dagokion sostengua, gelan nahiz gelatik kanpora, ikasketaburutzak gainbegiratuta, orientatzailearen ahokularitzarekin.
–Ikastetxeek bermatuko dute aniztasunari arreta emateko berariazko planetan garatzen diren programazioak, esperientziak, baliabideak eta materialak irakasle...
Para continuar leyendo
Solicita tu prueba